संक्षिप्त परिचय

नेपाल दक्षिण एसियामा अवस्थित भूपरिवेष्ठित मुलुक हो, जसको क्षेत्रफल १,४७,१८१ वर्ग कि.मि. (५५,८२७ वर्ग माइल) छ। देशको पूर्व–पश्चिम लम्बाइ करिब ८८५ कि.मि. र उत्तर–दक्षिण औसत चौडाइ १९५ कि.मि. छ। नेपाल पूर्वमा पश्चिम बङ्गाल र सिक्किम, पश्चिममा उत्तराखण्ड, दक्षिणमा बिहार र उत्तरप्रदेश (भारत) र उत्तरमा चीनको तिब्बतसँग सीमाबद्ध छ। समुद्र (बङ्गालको खाडी) बाट करिब १,१२७ कि.मि. टाढा रहेको नेपाल विश्वको कुल भूभागको ०.०३% मात्र हो। नेपालमा विश्वका ८,००० मिटरभन्दा माथिका १४ शिखरमध्ये ८ वटा रहेका छन्, जसमा सगरमाथा (८,८४८.८६ मि.) विश्वकै अग्लो शिखर हो। यहाँ कोशी, गण्डकी, कर्णालीजस्ता ठूला नदीहरू र रारा, फेवा, गोसाइँकुण्डजस्ता सुन्दर तालहरू छन्।भौगोलिक विविधताका कारण नेपालमा उष्णदेखि टुन्ड्रा प्रकारका जलवायु पाइन्छ। यही विविधता र प्राकृतिक सौन्दर्यका कारण नेपाल सगरमाथाको देश, गौतम बुद्धको जन्मभूमि लुम्बिनी, सीताको जन्मस्थान र अद्वितीय राष्ट्रिय झन्डा भएको मुलुकका रूपमा विश्वभर परिचित छ।